PRS enggau SPDP Udah Tulah lalu Deka Mati

Kuching
Tuesday, 25th October 2011

PRS enggau SPDP Tulah. Dua iti Parti tu dijangka deka alah teruk dalam pengawa bepilih ti deka datai

Parti Rakyat Sarawak (PRS) enggau Sarawak Progressive Democratic Party (SPDP) nya parti ti majoriti diari ke bansa Dayak kelebih agi bansa Iban. Kedua-dua parti tu asal iya ari Sarawak National Party (SNAP). Ari berita ke dedinga pasal dua parti tu, maioh orang madah kedua-dua parti tu deka "mati" nitih ke Parti Bansa Dayak Sarawak (PBDS). Nyadi nitih ke pengarap Iban, parti PBDS, PRS enggau SPDP tu udah TULAH. Pemati kedua-dua parti ti agi idup tu dijangka deka ngangkat ke Parti SNAP lalu pia mega lalu deka nyadi ke pengangkat bansa Iban. Tang ni maya. Baka artikel ke ditulis aku ke sekali tu deka nguji nerang bakani ko kedua-dua parti PRS enggau SPDP tu tau mati.

Enti kitai sama ingat, parti SNAP bepun pecah serta PBDS ngaga penulah dalam taun 1981 udah bekau Dto Leo Monggie ti alah laban Dato James Wong dalam pengawa bepilih nyadi President Parti SNAP. Udah ti alah bepilih dia Dato Monggie enggau Datuk Daniel Tajem lalu ngaga parti PBDS.

Lalu dalam taun 2002 dia parti SNAP lalu bepecah baru. Nyadi kebuah SNAP pecah maia tu udah pengawa James Wong ke muai Datuk Tiong King Sing. Laban ke enda setuju enggau pengawa James Wong ke muai Datuk Tiong dia sida Tan Sri William Mawan lalu  ngelaban James Wong. Lalu bala ke nitih ke William Mawannya baka sida Peter Tinggom, Peter Nansian, Jacob Sagan Dunggau, Peter Nyarok, Sylvester Entri, Geman Itam, Judson Tagal enggau Tiki Lafe. 

Leadership Crisis tu ke ngujung ke SNAP lalu di"haram" ke oleh ROS  kena 5 Nov 2002 . Bekau tu dia bala ke rapat enggau William Mawan tu numboh ke Parti SPDP, lalu dalam kandang 3 hari dia SPDP lalu dikemendar ke oleh ROS, lalu diterima masuk BN.

Lalu baka parti PRS bemula kena bulan Disember 2003 leboh bala ti diulu ke Dato James Masing enggau Datok Sng ngelaban bla Dato daniel tajem nyadi Presiden udah bekau Dato Leo Monggie ti badu ngenyit nyadi President PBDS. Nyadi krisis tu ngujung ke parti PBDS di"haram"kan oleh ROS.

Lalu bala sida James Wong serta bala ti sayau ke SNAP ngelaban ROS ngena jalai becara. Lalu SNAP udah ada idup baru kena 23 Jun 2010 udah Court of Appeal ngemendar ke appeal SNAP. Lalu bepun arinya, SNAP lalu idup baru, lalu penusah lalu nuntung sida PRS enggau SPDP.

Nyadi enti kita meda kedua-dua bengkah parti tu ianya PRS enggau SPDP sama bisi penanggul di dalam. Di dalam PRS, crisis parti nya enggau Larry Sng dipeda lalu mandang ke Taib Mahmud nadai bebasa ke James Masing. Lalu maia bepilih taun tu tadi dia pengari parti tu di Pelagus ianya Stanley Nyitar dialah ke oleh George Lagong ianya  pengari ti mula-mula deka ngena lambang SNAP tang betukar ngagai Parti Bebas enggau pengelebih undi  2,837. Lagong bulih 5,740 undi lalu enggi  Nyitar semina  2,903.

Selain arinya, bisi mega sekeda pengari ari PRS ti bepilih dalam taun 2008 nya ukai dipilih Masing. Pengari baka William Nyallau Badak, Malcom Mussen Lamoh , Snowdan Lawan enggau Masir Kujat endang ukai pengari ke dipilih Masing. Maioh orang pecaya  dalam PRS endang bisi orang deka muai Masing. Taja ia udah selamat dalam krisis enggau Datuk Sng tang maioh agi orang dalam PRS deka muai iya. Baka Joseph Salang, ti dipeda makin kuat dijangka deka ngelaban Masing.

Lalu baka SPDP, parti tu dipeda  semina nganti maia aja deka pecah. Tan Sri William Mawan di dalam krisis ngelaban SPDP 5 dipeda  "lost command".  Nyadi ketuai pekara ti pemadu ditakutnya pasal "Lost Command" laban enti nadai command, ketuai tu deka nyadi orang ti nadai kuasa. Enti dalam sedadu enti pegawai lost command manah agi minta posting ari Unit ti di pegai.

Lalu krisis dalam SPDP tu deka ngujung ke parti SPDP pecah, lalu dia kitai deka meda pengada parti baru. Enti tu nyadi, aku jangka ia deka berepun maia pengawa bepilih ti deka datai.

Laban ti udah tulah, aku jangka kedua-dua parti tu ianya PRS enggau SPDP deka kilal dalam pengawa bepilih ti deka datai lalu ngujung ke parti dua bengkah tu deka mati. Lalu baka SNAP aku jangka parti tu deka angkat baru dalam pengawa bepilih ti deka datai...Idup SNAP, Mati PRS enggau SPDP!

Mupok Aku

Lalu dalam taun